Teyterj-awanj puromks
Мордовиянь тейтерь-авань V съездэсьКИНЬ НЕВТИЦЯ ТЕШТЕСЬ - ВЕЧКЕМАСЬ
Ноябрянь 28 чистэ республикань тейтерь-аватне печтясть кенярксов чи. Республикань Кудонь покш залсонть сынст пельде 360 делегатнэ пуромкшность эсест V съездэв. Тейтерь-аватнень приветствовамо ды мартост покш форумсонть участвовамо сакшность республикань Прявтось Н.И.Меркушкин, Государственной Собраниянь Председателесь В.А.Кечкин, Правительствань Председателесь В.Д.Волков, Россиянь Президентэнь Приволжской округонь Мордовиясо Главной Федеральной инспекторось А.М.Пыков, профсоюзтнэнь Федерациянь Советэнь председателесь А.И.Солдатов, министратне.
Чинь повесткантень совавтозельть отчетной докладонь теемась, Союзонь од правлениянь ды ревизионной комиссиянь пурнамось, од председателень кочкамось. Истяк жо республикань тейтерь-аватнень представительтне кенярдсть возможностентень кортамс талновтыцядонть, вейсэ вешнемс стакачитнень изнямонь китнень. Кочказель съездэнь Президиум, козонь совасть пек содавикс ды почетной ломанть, кода Мордовиянь народной артисткась М.Н.Антонова, академикесь Р.И.Александрова, Социалистической Трудонь Героесь Р.И.Жидкова, Здравоохранениянь министрань заместителесь В.Ф.Гурьянова. Нама, совавтозельть почетной инжетнеяк.
Докладонть теизе Мордовиянь тейтерь-авань Союзонь правлениянь председателесь Л.П.Ярославкина.
Любовь Павловна тешкстызе, што Мордовиянь тейтерь-аватнень форумось юты од тысячелетиянть ушодовомсто, конанть марто весе минь сюлматано покш кемемаст.
Кода а жаль, кортыцянтень сеске савсь ютамс стака енкстнэнень. Эно, сон зярдояк арасель шождакс, но масторсонть меельце шкань ютавтозь минень-сюнонь реформатне теизь сонзэ а цидярдовицякс. Тейтерь-аватне емавтызь икелень добовавкс праваст ды олячист профессиясост касомо, аванть ды эйкакшонть ванстомо ладязь политикасо.
Мордовиянь весе эрицятнестэ тейтерь-аватнеде 51,6 процент. Сехте сеедьстэ сынст лангс путови ответственность семиянь кирдеманть, эйкакштнэнь кастоманть кисэ. А вана общественной производствасо роботыцятнеде аламолгадыть. Рынканть лувс ютамсто сехте вишкине зарплата пандови сеть отраслятнесэ, косо важодицятнестэ весемеде ламо тейтерь-ават. Социальной сферасо - здравоохранениясо, образованиясо, социальной обеспечениясо роботыцятнеде 80 процентт тейтерь-ават. Ярмакт жо тов явовить ансяк "кадовиксстэнть". Секс тосо важодицятнень заработной платасткак народной хозяйствасо среднеенть коряс 65-70 процентэнь покшолмасо. Тень таркас яла аламолгадыть кредитованиясо, страхованиясо, снабжениясо, финансонь органтнэсэ важодиця тейтерь-аватне. Ды мик вейке отраслясо важодемстэяк сыненст пандови цератнеде аламо. Сурсо лововить тейтерь-аватне-предпринимательтне. Тень таркас ютксост яла аламолгадыть тевтеме кадовицятне. Те иень ноябрянь 1 чинтень весе роботавтомотнестэ тейтерь-аватнеде ульнесть 77,3 процент. Санитарно-гигиенической норматненень а отвечиця условиятнесэ роботыть 8 тыщат тейтерь-ават.
Пек талновты кода весе Россиянть, истя Мордовиянь демографиясонть стакалгадыця тевтне. Эрьгатя, те иень январьстэ-сентябрясто Мордовиясо чачсть 5267 эйкакшт, кулость жо 11200 ломанть. 1999 иень те шканть коряскак чачозетне аламолгадсть 1,3 процентс, кулозетне жо ламолгадсть мик 8,9 процентс. Тень таркас масторонок мирсэнть весемеде икеле теевиця абортнэнь коряс. Эрьва кемень пекиямотнестэ сисемтне прядовить каявтомасо.
Государствась, обществась а максыть тейтерь-аватненень участвовамс семиянь, эрямонь, шумбрачинь, аванть ды эйкакшонть интересэнзэ социальной ванстомантень аравтозь государственной политикасонть. Сынст общественной организациятнестэ ламотне лоткавтозь. Тагояк сурсо лововить законодательной ды исполнительной структурань покш должностнесэ уликс тейтерь-аватне. Мордовиясо ансяк вейке министра тейтерь-ава - Л.А.Иванова. Эште ули Госсобраниянь Председателень полавтыця Т.В.Тюрина, РФ-нь Пенсионной Фондонь МР-нь управлениянь прявт - А.Г.Морозова. Ды весе. Госсобраниянь 75 депутатнэстэ ансяк кото тейтерь-ават, те весеместэ кавксо процентт. Мерьсынек, Россиянь Госдумасояк эйстэст ансяк 34. Лия должностнесэ сынь а вийсэст мезеяк полавтомс политикасонть, примамс ответственной решеният.
Неть ды ламо лия проблематнеде докладонть толковамсто оймень сэредькс марто кортасть Рузаевкань муниципальной образованиянь тейтерь-авань советэнь прявтось Н.В.Иняткина, Ардатовасто В.М.Сучилина, МР-нь Здравоохранениянь министрань заместителесь В.Ф.Гурьянова, тейтерь-авань движениянь ветеранось В.Д.Яськина, МР-нь Трудонь ды занятостень министрась Л.А.Иванова, М.Е.Евсевьев лемсэ МГПИ-нь проректорось Л.В.Василькина, Приборостроительной заводсто Н.И.Фролова, Саранскоень общеобразовательной 23 номер школань директорось Л.И.Гудулина, Н.П.Огарев лемсэ МГУ-нь аспиранткась Ксения Кантеева, академикесь Р.И.Александрова.
Вал максозель Мордовия Республикань Прявтонтень Н.И.Меркушкиннэньгак. Николай Иванович ушодсь мельспаронь евтамсто истямо ойместэ лисиця ды, теке марто, тевев ветявиця кортамонть коряс. Прявтось алтась теемс весе эрявиксэнть тейтерь-авань движениянть кемекстамонь ды виевгавтомань коряс. Тешкстызе семиясо ды обществасо тейтерь-аванть мейсэяк а полавтовиця ролензэ. Вейсэнь ды сехте покш тевекс лови ломантнень воспитаниянть. Видекс лови властень структуратнесэ тейтерь-аватнень, меремс, аразьксчинть лангс невтематнень-пеняцямотнень. Ансяк эдь, келя, кочкамотне - тевесь народонь, тейтерь-аватненень эстест эряволь бажамс ломантнень мельс туемантень. Лия жо покш постнэс, невтемакс, райононь прявтокс, тейтерь-аватне а молить сынсь. Те вельть стака канстось сеедьстэ а кепедевишка од, чуморксов цератнененьгак.
Н.И.Меркушкин кортась масторсонть ды республикасонть экономикань тевтнеде, толковазель од ломанень политикадонть, заработной платанть покшолмадонть, эйкакшонь пособиятнень пандомадонть ды ламодо лиядо. Алтась ванкшномс весе сеть кевкстематнень ды пшкадематнень, конатнес тесэ эзь сато шкась.
Мейле Прявтонть кедьстэ Россиянь ды Мордовиянь покш казнеть получасть Рузаевкань чугункань кинь станциянь телефонисткась Н.П.Тимонина. Сон казезь II степенень орденэнь медальсэ. Мордовиянь Государственной драматической театрань артисткантень З.Е.Павлованень максозь Российской Федерациянь заслуженной артистэнь лемесь. МГУ-нь преподавателентень Е.А.Мелентьеванень - Мордовия Республикань высшей школань заслуженной роботникень лемесь.
Вете ды седе ламо эйкакшонь триця зярыя аватненень Прявтось макссь Благодарностть, именной част ды питней казнеть. Съездэсь ловизе тейтерь-авань республикань Союзонть роботанзо парокс. Весе толковавиця кевкстематнеде примазь решениятнень коряс кемекстазь постановления, од правлениясь Союзонь председателекс таго кочкизе Л.П.Ярославкинань.
