Паро кулятне
Велень эйдень кужоПаро казне тейсть Велень хозяйствань роботникень чинтень Атяшевань райононь ?Труд¦ кооперативень тружениктнень туртов. Те сексня Таразбуесэ панжсть эйдень кужо! Эрьгатя, тень теемс мусть возможность сестэ, зярдо оштнэсэ улицятне пекстневить, калавтневить, максневить эрьва кодамо офис, магазина, контора алов.
Веленть куншкас те мазый, весе эрявицянть марто кудось стявтозель умок. Сонзэ тевс нолдамс эзь максо ?перестройкась¦ реформанзо марто. Но ушодкстонть эзть стувто, ванстызь зданиянть целасто-ваньксстэ. Ды, окойники, решизь панжомс кужонть. Эйзэнзэ усксть койкинеть, стольнеть, шкафт, пидемс-панемс эрявикс оборудования, вальматнева поволесть мазый шаршавт, киякстнэва ацасть лембе паласт, неявикс таркава ладсесть мазый налкшкеть.
Кужонть торжественнасто панжомась теевсь веленть туртов покштояк покш событиякс. Сакшность ве ендонь инжетькак. Ютксост v Мордовия Республикань Правительствань Председателесь Н.В.Петрушкин, райононь прявтось М.А.Сурков. Мерьсынек, Михаил Алексеевич эште те округканть ютась МР-нь Госсобраниянь депутатокс. Кода кортыть, сонсь Пазось мерсь тензэ лездамс велень эйкакштнэнень ды аваст туртов. Инжетне састь аволь чавонь кедть v тусть питней казнеть.
Кужонтень покш мельсэ сеске анокольть ветямс 25 эйкакшт. Иест v кавтосто саезь сисемс. Эзть отказа сетнедеяк, кинь лия таркасо эриця тетятне-аватне кадызь ваномс колхозница бабаст туртов. Теке кудонтень сеске ютась школань столовоесь ды васенце классось. Секс сон лемдязель школакс-садикекс. Ниле тонавтницятне уроктнень прядомадо мейле сыть налксеме лиятнень юткс, чи куншкане маднить оймсеме, ярсыть, кудов максозентькак теске топавтсызь.
Кужоонь панжомась тейсь эште вейке паро тев: зярыя од ломанть, специалистт мусть тестэ эстест тев, кадовсть велев. Вант, теевить од семият ды кужов якиця эйкакштнэ эштеяк ламолгадыть.
Т.РЯБОВА.
Моли фестиваль
Кишти, моры одкспорась
Саранскойсэ теевсь паро коекс эрьва иестэ ютавтнемс народной творчествань фестивальть. Тедедеяк, ковонь перть, ноябрянь 3 чистэ саезь декабрянь 3 чис, республикань Культурань кудонь сцена лангсо эсь ерокчист невтнить райононь ды ошонь художественной самодеятельностень коллективтне.
Те паро тевенть ушодыцятне v Мордовия Республикань культурань, образованиянь, внутренней тевень министерстватне ды од ломантнень тевтнень коряс комитетэсь.
Ноябрянь 3 чистэ фестиваленть ушодыцякс ульнесь Зубова Полянань райононь Культурань кудонь художественной самодеятельностень коллективесь, мельгаст ноябрянь 4 чистэ ваныцятнень кенярдовтызь Краснослободской ды Инсарской районтнэнь коллективтне. Пек мельс тусь Краснослободской райононь Колопина велестэ эйкакшонь ансамблясь, кона морызе ?Бабань церась¦ моронть. Истя жо ваныцятнень кенярдовтызь Инсаронь райононь ?Жаворонок¦ эйкакшонь фольклорной ансамблясь, конань прявтсо Мордовиянь заслуженной учительницась Людмила Пундикова. А кода мазыйстэ морызе мокшонь моронть кото иесэ Оля Валькова, валсо а евтави. Ноябрянь 6 чистэ ваныцятнень мельс пек тусть Ромодановань ды Лямбирень киштицятне-морыцятне. Пек кувать сценанть лангсто эзть нолда ?Тимоня¦ киштемань группанть. Кодат мазыйть нарядост ды сынсь тейтерькатне, теке буто нимилявт ливтнить сценанть ланга, вановлить ды вановлить лангозост. Те группась сакшнось Атемарень эйкакшонь искусствань школасто. Истя жо ваныцятнень кенярдовтызь сазортнэ Алсу ды Гульнара Бикбаеватне, конат морасть татаронь моро. Ютазь недлячистэ покш мельспаросо ванынек Ельникень ды Кадошкинань художественной самодеятельностнень.
Маласо читнестэ эсь талантост невтнеме кармить Ардатовань v ноябрянь 17 чистэ ды ноябрянь 18 чистэ Теньгушевань ды Дубенкань райононь коллективтне. Старошайговань ды Атюрьевань участниктне сыть ноябрянь 19 чистэ. Ичалкансетне кенярдовтсамизь ноябрянь 24 чистэ. Ноябрянь 25 чистэ кармить ерокчист невтнеме мик колмо коллективть v Игнатовань, Атяшевань ды Чамзинкань, а 26 чистэ сыть Березникть ды Кочкуроват. Декабрянь васень колмо читнестэ эсь талантост невтьсызь Темниковань, Торбеевань, Ковылкинань, Рузаевкань ды Саранскоень творческой коллективтне. Мельтеме илинк кадо те покш мероприятиянть. Садо ваномо. Янксеме а карматадо.
Н.КЕНЯЙКИНА
Мокш-эрзянь одирьватне тукшныть мельс
Тедеде прядови Мордовиянь этнологтнень колмо иень роботаст. Сынь яксесть диаспорасо мокш-эрзянь велетнева, ванность ды тонавтнесть сынст эрямо коест. Те иень августсто ды сентябрясто те этнографической экспедициясь, конань прявтсо исторической наукань кандидатось Людмила Никонова, ульнесь Татарстанонь ды Чувашиянь эрзянь ды мокшонь велетнесэ.
Ней Татарстансо эрить 30 тыщадо ламо мокш-эрзят, Чувашиясо v 18 тыщат. Этнологтне редизь: бути велесэнть хоть пелест эрицятне эрзят эли мокшот, тосо ванстовсть аволь ансяк келесь, мик кезэрень эрямо коест-ладост. Мокш-эрзянь секеть оршамопельтнень можна вастомс аволь ансяк праздник чистэ ды сцена лангсто, но сеедьстэ кудо юткстояк.
Эрьва кодат раськетнень ютксо сюлмотнень кемекстамодо кортыть ламо венчамотне-урьвакстоматне. Людмила Никоновань валонзо коряс, татаронь цёратне сеедьстэ сайнить никс мокш-эрзянь тейтертнень. Школатнесэ, татаронь кельденть башка, тонавтнить мокш-эрзянсентькак. Ламо велетнесэ улить фольклорной ансамблят, конат ванстыть мокш-эрзянь культуранть. Этнологтнень кецявтызе сеяк: бути велесэнть эрить 3-4 раськень ломанть, эйкакштнэ маштыть кортамо весе кельтнесэ.
Материалтнэ, конатнень пурнынзе те экспедициясь, совить ?Мордва республик Поволжья и Приуралья¦ вейсэнь монографиянтень, конань лангсо роботыть НИИЯЛИЭ-нь сотрудниктне.
Юбилей
Ойме валдонь явшиця
Субутасто мокшонь прозаикесь ды драматургось Валентина Ивановна Мишанина карми тешкстамо чачома чинзэ.
В.И.Мишанина чачсь 1950 иестэ Мордовия Республикань Кадошкинань райононь Адашева велесэ. Тиринь велесэ прядызе средней школанть, 1973 иестэ А.М.Горький лемсэ литературной институтонть. Важодсь эрзянь-мокшонь книгань издательствасо редакторокс, ?Мокша¦ журналсо литсотрудникекс, прозань отделэнь прявтокс ды ответственной секретарекс, эрзянь-мокшонь национальной театрасо литературной пельксэнь прявтокс. Ней Валентина Ивановна топавты Мордовиянь Писателень союзонь правлениянь председателень полавтыцянь тевенть.
В.И.Мишанинань литературной кизэ ушодовсь эйкакштнэнь туртов стихень ды евтнемань сермадомасо. 1972 иестэ эрзянь-мокшонь книгань издательствась нолдызе сонзэ евтнемань васенце книганзо. Истямо лем марто v ?Начало пути¦. Мейле Валентина Ивановнань лиссть вейке омбоце мельга книганзо. Тагояк евтнемань. Неть v ?Серебряная ракушка¦ (1974), ?Дымное утро¦ (1976), евтнемань ды повестень книгатне ?Люди в дороге¦ (1985) ды лиятне. Мезде сон сермады, кодат сонзэ героензэ? Велень, ошонь эрицят. Сон машты совамс геройтнень духовной мирэзэст, неень эрямодонть евтни философскойстэ. Неть енкстнэ вельть редявить Валентина Ивановнань ?Ворота времени¦ повестьсэнть, кона лиссь Московсо, ?Детская литература¦ издательствасо.
В.И.Мишанинань перанзо алдо лиссть ?Ветви священного дуба¦, ?Накануне Троицы¦, ?Когда на дворе воет собака¦ ды лия пьесатне. Эйстэст кой-конатне невтезельть-путозельть эрзянь-мокшонь национальной театрань сцена лангсо.
Вана писательницанть ?Серебряная ракушка¦ книгась нолдазь Таллиннсэ эстононь кельсэ. Ламо евтнеманзо печатазельть центральной печатьсэ.
Республикань Писателень вейке покш промкссо В.И.Мишанинань творчестванзо ванкшномсто ученойтнестэ та-кие яволявтсь: ?Мишанина v ойме валдонь явшиця¦.
В.И.Мишанина v Россиянь Писателень союзонь член, Мордовиянь Ленинской комсомолонь премиянь лауреат.
?Эрзянь правда¦ газетань теицятне ды сонзэ ловныцятне кучить юбиляронтень седейшкавань поздоровт чачома чинзэ кувалма ды арсить сермадомань тевсэнть од изнявкст.
Светэнть емамс кадовсь
Вана уш зярыя иень перть Иоанн Богословонь Откровениянзо (Апокалипсисэнть) тонавтнемадо мейле французской ученоесь Жерар Бодсон сась истямо мельс: светэнь емамось карми улеме 2043 иень февралень 5 чистэ. Тенень тувталокс ули колмоце мировой войнась.
Иоанн Апостолось v Иисус Христосонь тонавтницязо, Откровениянзо сон сермадызе минек эранть ушодовомсто. Се шкастонть саезь масторлангонь эрицятне башка мель явсть те книгантень. Самай Апокалипсиссэнть сермадозь меельце шкань башка событиятнеде.
Ламот Апокалипсиссэ сермадозенть чарькодемстэ саить 666 числанть. Теде а отказы Жерар Бодсононь группаськак. Тевесь сеньсэ, што ивиртсэ, кода греческой кельсэяк, цифратне невтевить аволь башка знаксо, а буквасо. Секс 666 числась ловнови кода валсюлмавкс.
Французской ученоенть мелензэ коряс, мирэнть емамосо кармить улеме чумокс Китаень ды Северной Кореянь эрицятне. Сынст ютксо кирвази война, кона ветясы емамос весе масторлангонть.
Евросоюзонь лезкс
ТАСИС-эсь Мордовиясо
Россиясо вана уш кавксо иеть совавтневи эрямос Европань Союзонь ТАСИС экономической проектэсь. Сонзэ васенце смустезэ v масторсонок лия государстватненень ладиця социально-законодательной лувонть теемась, косо эряви v аволь ансяк превень максомасо, ярмаксо лездамоськак. Невтемакс, те шканть перть колмо тыщадо ламо эрьва кодат проектнэс явозь ниле миллиардто ламо еврат.
Весе Россиянть келес Евросоюзонь члентнэ ловизь проектэст топавтомантень ладицякс вете енкстнэнь v Мордовиянть, Красноярской краенть, Новосибирской, Оренбургской ды Орловской областнень. Сынст кочкамсто домкасто тонавтнезельть регионтнэнь политикаст, экономикаст ды ламо лия тевест.
Ды вана неть читнестэ, проектэнть тевс нолдамонь шканть прядовомсто, Мордовиянь Экономикань министерствасо ютась пресс-конференция. Сонзэ ветясть МР-нь Экономикань министрань васень заместителесь Л.А.Майоров ды ТАСИС проектэнь прявтось Арто Лухтала.
Кода мерсь А.Лухтала, Россиясо регионтнэнь ютксо пек покшт авейкетьксчитне: веенстнэ седе сюпавт эйсэст сырьянть улемадо, лиятне тень коряс кадновить удалов. Вана неть социально-экономической явовкстнэнь киртямосонть ашти сынст основной задачасткак.
Мордовиясо арась нефта, лия мезе. Тень таркас улить кить келейгавтомс вишка ды средней бизнесэнть. Самай сонензэ явозельгак сехте покш мелесь.
Л.А.Майоров евтнизе, мезе теезь ТАСИС-энть лездамонть вельде республикасонть. Васняяк, теезь домка анализ республикань экономикантень, таштазь содамочи омбо мастортнэсэ эрямодонть. Ломантнеяк ушодсть лиякс арсеме. Тонавтнеманть прядомадо мейле получазь лицензия лиятнень тонавтоманть туртов, роботанть поладсызь сынсь россиянтнэ.
Проектэнь руководителесь шнызе Мордовиянть сень кисэ, мекс республикантень явозь ярмактне ютавтовить алкукс тов, ков эряви. Лиясо косо эрси, што сынст явшесызь кие соды ков.
Паро примерэкс Арто Лухтала евтынзе Грециянть, Испаниянть, Ирландиянть, Португалиянть, конатне ТАСИС проектэнть лездамонь вельде течи редявикстэ виевгавтыть-кепедить экономикаст. Койсэнзэ, Мордовия Республикасо улить весе условиятне виев регионокс теевеманть туртов.
Т.РЯБОВА.
Келесь ды культурась
Теевсь английской келень ды культурань вейсэндявкс
Октябрянь меельце читнестэ Мордовской госуниверситетэнь английской келень кафедранть юрсо ютавтовсь ?Язык, культура, коммуникация: контексты современности¦ научной конференция. Васенцеде ученойтне, вузонь ды ошонь школань тонавтыцятне истя келейстэ толковасть кельсэнть полавтоматнень ламо енкстост ды неень шкань тонавтомань ды тонавтнемань методтнэде. Эрьва темась ванкшнозь башка секциясо. Покш мель ульнесь явозь мастер-классонтень. Тесэ тонавтницятне эсь ютковаст толковасть английской келенть тонавтомань неень шкань методтнэде. Меельце заседаниясонть толковавсть вузтнэнь ды ошонь школатнень ютксо кеме сюлмотнеде. Истя жо кемекстызь Мордовия Республикасо английской келень ды культурань вейсэндявксонть. Конференцияв пурнавозетне састь ве мельс: истят вастовоматнень тейнемс седе сеедьстэ.
ПРОДУКЦИЯНОК ЛОВОЗЬ ВАДРЯКС
Ютазь недлястонть Московсо ютась ?Регионы России-2000¦ покш выставка-ярмунка. Тов усксизь эсь продукцияст Мордовиянь 23 предприятияткак. Всероссийской выставочной центрасонть эрзя-мокшонь экспозициясь ульнесь аравтнезь 120 квадратной метрасо. Ды марят-теят, сон явовтызе ламо ванкшныцятнень ды специалистнэнь мелест.
Кода пачтясть минек редакциянтень ?Мордовэкспоцентр¦ государствененой предприятиясонть, Мордовия Республикань ламо предприятиятне (сынст ютксо ульнесть кода промышленнойть, истя перерабатывающейть) сайсть вадря казнеть, конат эште весть кемевтить сенень, кодамо паро продукция машттано нолдамо. Васняяк лецтясынек вана мезенть: МР-нь Прявтонть Администрациясь ды ?Мордовэкспоцентр¦ государственной предприятиясь, конат путсть сехте ламо вийть те выставканть анокстамсто, тешкстазельть Всероссийской выставочной центрань ды те выставканть-ярмунканть оргкомитетэнь Дипломсо. Кода ловизе жюрись, Мордовиянь экспозициясь ульнесь теезь лиятнень коряс ков седе вадрясто ды мазыйстэ.
Выставкань Дипломсо ды сырнень медальсэ казезельть ?Мордовспирт¦ ОАО-сь (?Эрзя¦, ?Бучумовская¦, ?Саранская¦ ашо винатнень, ?Любительская¦ настойканть кис), ?Сарансккабель¦ ОАО-сь (кавто видэнь кабельтнень кис).
Ламо лия перерабатывающей ды промышленной предприятиянок тешкстазельть сырнень, сиянь медальсэ, Дипломсо се, тона башка продукциянть кис. Выставкань покш казнеть сайсть ?Атяшевский¦, ?Максо¦ сывелень комбинатонь колбасатне, ?Атемарская¦ птицефабрикань, ?Взлет¦, ?Надежда¦ ОАО-нь сыратне, скалойтне, Ардатовань светотехнической предприятиянь ?Ксенон¦ ЗАО-нь кавто светильниктне.
Выставкась-ярмункась лездась минек предприятиятненень марямс эсь пряст лиятнеде а седе берянекс. Лисни, сынст саты виест пелькстамс эсест кондятнэнь марто, микшнемс эсь продукцияст республиканть томбале, весе Россиянть келес.
С.БУЯНКИН.
