Истя уш сон мелявты-
Г.Д.Мусалевнень v 60 летНоябрянь 19-це чистэ Григорий Дмитриевич Мусалевнень топодить 60 иеть. Монь койсэ, сонзэ ней содасызь аволь ансяк Мордовия Республикань, томбалень эрзятнеяк. Меельце кеветее иензэ сон целанек алтынзе эрзянь келенть, койтнень-кирдатнень ванстомантень. Григорий Дмитриевич апак пеле корты асатыкстнэде, национальной проблематнеде. Кинень сонзэ мелензэ-тевензэ кадовить а чарькодевиксэкс, лиятнень тандавты апелемачизэ, колмонстнэ, мекевланк, бажить теевемс мартонзо малавиксэкс.
Чачсь Г.Д.Мусалев Игнат ёнксонь Кшуманця велесэ. Тетянзо Дмитрий Степановичень войнадонть икеле саизь переподготовкав армияв, тосто понгсь фронтов ды эзь велявтояк. Истя авазо Екатерина Алексеевна кадовсь ниле эйкакш марто. Войнанть печтизь ансяк колмотне. Ней кадовсть эйстэст кавто братт. Николай Дмитриевичень v ученоенть-математикенть эрямосто туемазо эште ламонь мельсэ v сон кулось овсе аволь умок. Григорий Дмитриевичень авазояк эште яки мода ланга. Иетнеде тензэ уш ламо: кавксоньгемень вейксэ. Ялатеке пильге лангсо.
Г.Д.Мусалевонь эйкакшпорасто Кшуманця велесэ ульнесь ниле классонь школаяк. Тосо вишка Гриша тонавтнеськак. Мейле эйкакштнэде аламолгадсть, школанть пекстызь, кадовозтне кармасть якамо Игнат велень средней школантень. Паро, Кшуманцясь ашти поводезь ладсо Игнат велентень ды якамо таркась аволь васоло.
Кшуманцянь ниле класстнэде мейле Гриша од цёрась прядызе Игнат велень средней школанть ды тусь тонавтнеме Саранскоев университетэв v математикань факультетс. Кода сонсь лецтни теде, математиканть кочкизе покш братонть лангс ванозь v тонась уш тонавтнесь те тевентень. 1967-це иестэ университетэсь прядозель а беряньстэ. Од специалистэнть кадызь роботамо вычислительной математикань кафедрас. Курок университетсэ панжовсь вычислительной центра, тозонь ладязельть ловиця машинат. Од специалистэсь Григорий Мусалев тусь тов роботамо программистэкс. Сестэнь ловиця машинатне неень компьютертнэнь эйстэ ульнесть пек явовицят. Роботась машинатненень максовсь перфокарта вельде v те истямо варят-варят конев. Лия-лия ладсо аштиця варятнень коряс ловильгак машинась. Ялатеке сеть шкатнестэ евтазь техникась лововсь сехте одокс.
Теке жо шкастонть Григорий Дмитриевич прядсь эште вейке факультет v строительной. Тов сонзэ ветизе икелень стройотрядтнэсэ роботась. Строицякс жо тензэ савсь роботамс аволь ламо: кавто иеть. 1988-89 иетнестэ ульнесь проектэнь анокстамсто главной инженерэкс. Роботамонь лия иензэ жо меельцетнеде башка весе сюлмазь математиканть марто: тонавтсь университетсэ, училищасо. Кундсесь диссертациянь сермадомояк. Ансяк М.С.Горбачевонь ушодовкс перестройкась, конась эсензэ чаротнес сюлминзе весе ломантнень, велявтызе Г.Д.Мусалевонь эрямонзояк. Сон лиякс варштась эрямонть лангс, эсь раськензэ лангс ды чарькодизе v тиринь келесь, культурась, койтне-кирдатне аштить ёмамо лангсо.
Содазь, ютазь пингень 70-це иетнестэ, развитой социализмань шкасто СССР-сэ бажасть весе нациятнестэ теемс вейке народ v социалистической. Сеть шкатнестэ ульнесь лоткавтозь эрзянь ды мокшонь кельтнень тонавтомась школатнесэ. Нама, тень марто кодаяк эзь миря Мордовиянь национальной интеллигенциясь. Эсь раськень кис мелявксонь толось палсь потсо. Ды сон сеске лиссь ушов, зярдо 80-це иетнестэ ушодовсь полавкстнэде кортамось. Сестэ Г.Д.Мусалев вешни ве мельс прыця ялгат. Куроксто тееви малавиксэкс Д.Т.Надькин, Р.С.Кемайкина ды лиятнень марто. Сынь сеть шкатнестэ аштестькак ?Масторава¦ эрзянь раськень вейсэндявксонть ушодкссо.Григорий Дмитриевичнень седе пек савкшнось топавтомс а неявикс роботат: ладсемс тевть, пурнамс ломанть. ?Масторава¦ а покш вейсэндявксось теевсь ней эрзя-мокшонь раськень келей движениякс. Сонзэ съездэнь решениятне тейневить уш законокс.
Ялатеке Г.Д.Мусалев кадовсь оймсемань а содыця ломанекс. Ней сон вейсэндявсь Е.В.Четверговонь марто, конась ашти А.П.Рябов лемсэ эрзянь келень ванстомань фондонь прявтокс. Вейсэ пурныть ярмакт, тейнить эрзянь келентень алтазь праздникть, нолдыть ?Эрзянь мастор¦ газета. Эйсэнзэ сермадыть апак пеле. Нама, весе, мезде тосо сынь кортыть, мельс а саеви, ансяк зярдо ёмамо лангсат, кода ансяк а серьгедят, кода а пижакадат. Течи эрзянь келесь алкукскак ёмамо лангсо. Кияк мезеяк а корты, республикань неень прявтнэ теить ламо эрзянь ды мокшонь кельтнень ванстомга. Нолдавить газетат, журналт, ули национальной театра, радионь ды телевизоронь пачка молить передачат, университетэсь аноксты национальной кадрат. Ялатеке, течи кассть сеть, кить эзть тонавтне школасо тиринь кельтнень. Нама, сыненст стака саемс кедьс эрзянь газета эли журнал, эсь кельдентькак кортыть, кода а эрявикстэ. Ансяк, кода толковить содыця ломантне, эрьва раськесь, эрьва келесь, аштить весе цивилизациянь сюпавчикс, секс сынь ванстомат. Истя арси Г. Д.Мусалевгак. Тень кис сон мелявты, пижни-севны, ацирьгали, ютавтни озкс- Паряк ламонть теи аволь истя- ?Эрзянь правдаськак¦ аволь весе тевсэнзэ шны. Ансяк истямо уш сон ломанесь. Истя лиси ушов потмо виезэ, эсь раськеде мелявксозо.
Н.НИКОЛАЕВ.
