Коммунальной тевть
ОШОНЬ ВАНСЬКАВТЫЦЯТЭште а пек умок ЖКХ-нь реформась ульнесь прок ормаменькс Россиянь экономикань весе кажотнень эйстэ. Нурька шкань перть анокстазель пек кецявтыця концепция, конань вельде арсевсь эрямо таркань витнемань-петнемань, кирдемань, ваномань тевень ёмавкстнэнь путомс эрицятнень лавтовост лангс ды теде мейле 2000 иентень ютавтомс жилищно-коммунальной хозяйстванть ёмавкстомо важодиця отраслякс. Ансяк вейке тевесь v мель, омбоцесь v сонсь эрямось. Текень кувалма эрямось невтизе, што натой сеть лезэв тевтненень, примеркс, газонь котельноень теемантень, эрявить покш ярмакт, а сынь жо, кода свал, зярдояк а сатнить. Россиянь жилищно-коммунальной хозяйствань предприятиятнень туртов долкось таштавсь течинь чис а ёвтавияк зяро миллиононь туросо. Тень лангс апак вано, эряви вешнемс энергиянь, эрьва кодамо ёмавксонь ванстомань кить-янт. Эдь аволь ансяк апандоматне ?лепштить¦ коммунальной хозяйстватнень, а истя жо ведень, лембень, газонь, электричествань ёмавкстнэ, конатне а совавтовить кодамояк нормативтнес. Ансяк кода тосо илязо уле стака, жилищно-коммунальной хозяйствань предприятиятне а кадныть эсь тевест v сынь важодить.
Истя, примеркс, роботы неень шкастонть Саранск ошонь ?Спецавтохозяйство¦ муниципальной предприятияськак. Сеске мертяно, роботаст аволь шождатнестэ. Сон, кода мерить, явови кавто пельксэв: ульцянь урядамось ды мусоронь пурнамось. Текень кувалма предприятиясонть теезь кавто механизированной колоннат. Вейкенть лемезэ ульцянь колонна, омбоценть v мусоронь пурныця колонна.
Ульцянь колоннань лемесь сонсь корты эсь прядонзо. Чарькодеви, што сон уряды весе сеть ульцятнень, конат совавтовить Саранск ошонтень. Весемезэ сынст покшолмаст 100 вайгельбень туросо. ?Спецавтохозяйстванть¦ мельга кемекстазь сеть ульцятне, конатнень эзга ардтни весе ошонь транспортось. Текень кувалма сыненст пек пштистэ ды эрязасто ваннома ульцянь ки ланготнень ваньксчист мельга. Кода неяви, сехте стака те колоннантень эрсекшни тельня, зярдо кавто-колмо чис вали зяро лов, што верталёттомо мейсэяк а ютават. Секскак, штобу истят тевть авольть лисне, предприятиянтень эряви шкастонзо анокстамс весе ловонь урядамонь техниканть, инвентаренть. Эйгажань шкастонть сонензэ истя жо анокстама песок марто салонь смесь конадонть, ки лангонь почодомс телень перть тукшны 12-15 тыщат тоннат. Смесесь анокстави истямо ладсо: 15 машинат песоконть лангс каяви 1 машина песок, седе тов бульдозерсэ човоряви, зярс-бути ойми ды нолдави тевс. Тундо ёнов, зярдо ловось солы, весе те човорявксось тенсеви ды ускови шукшпряв. Тешкстасынек, те иентень сондензэ анокстазь сатышка. Примеркс, ансяк вейке салдонть ускозь тей 40 вагонт. Песоконть жо рамить Мордовиянь карьертнэстэ. Теде башка ульцянь колоннантень савкшны урядамс ды усксемс ловонть ошонь томбалев Советской площадьстэнть саезь Главпочтамтонть видьс. Сави меремс, ловонь прамо шкастонть предприятиянь диспетчертнэ, шофертнэ, трактористнэ дежурить и чить, и веть. Чарькодеви, што кизна истямо робота а ветяви. Кизэнь пси чине тесэнь ломантне ведьсэ валныть ульцятнень ды истямо ладсо лекстявтыть эйсэнек чипайденть.
Омбоце мусоронь пурнамонь колоннась уряды ошонь твёрдой бытовой отходтнэнь. Тей сови эрямо кудонь шукшпрятнень вакссо контейнертнэстэ мусоронь урядамось ды ускомась сонзэ ошонь томбалев. Эрьва чистэ валскень 5 чассо те колоннась уш роботасо. Савкшны ардтнемс тенст весе ошонь объектнэнь ланга, конатнень ютксо эрямо кудотне, школатне, больницятне, библиотекатне ды истя седе тов. Теке жо колоннась топавты переработкань тевентькак, пурны макулатура, яки-паки горполигононть мельга, козонь ускови весе мусорось. Лиякс меремс, те роботась пек благородной, ансяк кой-косто а весень мельс туиця. Примеркс, ульнесть истят тевтькак, зярдо ошонь эрицятне пек рана самонть ды машинасо пурнамонть кис урядыцятнень лангс нолдтнесть и бутылкат, и банкат, и модамарть. Те ёнксось эштё весть тешксты кодамо минек ?покш культуранок¦, ?потмоёжонь содамочинек¦. Апак кавтолдо мертяно, истямо ?мелень ваномась¦ эште седеяк пек тулкади удалов ?Спецавтохозяйстванть¦ тевензэ. Сеедьстэ эрси истяяк, што кой-кона квартиросъемщиктне яжить ваннань, туалетэнь пирявксост, а кирьпецтнень валить мусоропроводс. Теде мейле конвейерэсь тееви кавксть-колмоксть седе стакакс, конань кепедемадонзо мейле яжави весе подъёмникесь. А эдь меельце шкастонть тесэнь технической базась лавшомсь седе а ков. Сави меремс, тесэнь автомашинатне, трактортнэ, грейдертнэ умок уш эризь эсь пингест.
v Лиятнень коряс, v ёвтни ?Спецавтохозяйствань¦ главной инженерэсь Виктор Николаевич Есин, v пек таштомсть ?КамАЗ-тнэ¦, конатнень кувалма лиясто минь кандтано колмоньгирдань ёмавкст.
Алкукскак, бути, примеркс, ?КамАЗ-ось¦ тапави, сонзэ тевензэ топавтомо эряви кучомс колмо вишка машинат, самай секскак те тевенть каршо истя виевстэ бороци тесэнь администрациясь. Паряк текень кувалма мелят ?Спецавтохозяйствась¦ рамась колмо мусоронь усксиця ?ЗИЛ-т¦. Ансяк теиця заводтнэ пурнызь сынст ковгак а маштовикстэ.
Гидравликась, насостнэ, швелертнэ лавшодояк лавшот. А кенерят мезеньгак тееме v сынь уш каладыть. Секскак тесэнь специалистнэ емавтсть неть машинатнень лангс малав колмо ковт. Полавтызь гидравликанть, одов сваризь швелертнэнь, путсть виев гидронасост, виевгавтызь кузовонть ды ансяк теде мейле те од ?Зил-тнэ¦ кармасть важодеме кода эряви.
Бути уш кортамонок тусь эсь тевень содыця специалистнэде, мерсынек, што сындест ?Спецхозяйство¦ муниципальной предприятиясонть пек аламо. Тесэ а сатнить шофертнэ, гидравликас чарькодицятне, агрегатчиктне, трактористнэ. Примеркс, Саранскойсэ эзь кадовт вейкеяк учебной заведения, конась бу анокставоль трактористт. А эдь кода иля корта, тракторонь тевесь v аволь мельде-валдонь. Ды се, конась арси, што тракторс тонадомась стяконь тев v тунь а виде. Текень кувалма, истямо ладсо ладязь тевесь пек талновты предприятиянь администрациянть.
Талновты сеяк, што вана уш зярыя иеть а ютыть важодеме хозяйствантень од ломантне. Тесэнь роботыцятненень малав уш ведьгеменень трокс, улить пенсионерткак. Лиякс меремс, весе участкатнесэ важодить ташто кадрат. Ули истямо тевгак: ломантне сыть,зярс-бути роботыть ды туить. Койсэнек, васняяк, те тувталось толковави сеньсэ, што зарплатась предприятиясонть шкастонзо а максови. Ломанесь ашти-теи кавто-колмо ковт ярмактомо, велявты ды туи. Эдь, бути лецтямс се шканть, зярдо важодсть тесэ ташто прявтнэ, зарплатань коряс долкось предприятиясонть ульнесь 9 ковт. Неень шкастонть жо сон киртявсь 2 ковс. Прянь апак шна мертяно, ламосо мейсэ тень теемстэ лездась се енксось, што предприятиянть совавтызь ?Заказчик ЖКХ¦ Саранск ошонь службанть структурас, конань прявтсо вана уш зярыя иеть важоди Ю.Г.Филев. Лездась сеяк, што ?Спецавтохозяйствантень¦ сась важодеме од прявт v Виктор Васильевич Линьков. Кода минь рединек, те ломанесь аволь ваны икелев, сонзэ пек ламо арсеманзо предприятиянть структуранзо, технической базанзо полавтоманзо, лия, од услугатнень максоманзо коряс.
v Тень теемстэ, v евтни ?Спецавтохозяйствань¦ главной инженерэсь В.Н.Есин, v ламосо тенек лезды ?Заказчикень¦ прявтось Ю.Г.Филев.
Ды те алкукскак истя, примеркс, бензинэнь, соляркань, машинань оень тевтнень ?Заказчикесь¦ педе-пев саи эсензэ лангс. Ковозонзо ансяк вейке уштомапеленть кис эряви пандомс 500-600 тыщат целковойть, а тельня, виев ловонь прамо шкастонть, малав 900 тыщат целковойть. Секскак ошонь бюджетэнтень те предприятиянть кирдемазо сти пек питнейстэ. Но эдь арседе тынсь, сонстемензэяк кодаяк а эряват. Бути тельня ошонь ки ланготне а кармить урядавомо v сти весе автотранспортось, бути а кармить ванськавтовомо кудонок вакссо мусоронь контейнертнэ v ошонок ваи шукшпрянь навозонть потс. Секскак, кода стака илязо уле, ?Спецавтохозяйстванть¦ эряви ванстомс. Кода иля корта, тесэнь важодицятнень лангс свал эряви ваномс лия варштавкссо. Эдь важодемс те предприятиясонть стакадояк стака. Пек сеедьстэ ломантне а содыть мезе те оймсемань чись. Ансяк мезеяк а теят, истямо уш тесэнь важодемань лувось. Ды кода неяви, ламонень сон уш ней теевсь коекс. Кой-кить сюлмизь ?Спецавтохозяйстванть¦ марто весе эрямост. Койсэнек, истямокс можна ловомс мусоронь пурныця колоннань водительтнень Иван Николаевич Яковлевень (важоди 1978 иестэнть саезь), Михаил Васильевич Кокаревень (важоди 1981 иестэнть саезь), Владимир Александрович Кулагинэнь (важоди 1981 иестэнть саезь), ульцянь колоннань шофертнэнь Олег Николаевич Разумовонь (важоди 1984 иестэнть саезь), Иван Михайлович Емельяновонь (важоди 1979 иестэнть саезь), Сергей Петрович Ширманкинэнь ды лиятнень.
Теке марто предприятиянтень пек стака запчастнень кувалма, конатнень кисэ кой-кона техникась ашти нейгак. Эдь кода а кода эйстэнзэ ?Спецавтохозяйствасонть¦ 150 единицат. Эрьва чистэ мезеяк ды эряви рамамс: то свечат, то фильтрат, то шлангт, то вкладышт ды истя седе тов. А кода минь содатано, течинь чине куш кодамо кшни пельксэнть кис пандома ярмакт ды а вишкинеть. Секскак тесэтненень савкшны витнемс-петнемс таштнэнь, конатнесэ, содазь, васов пек а ардат. Тень лангс апак вано, теленень весе ловонь урядамонь техникась предприятиясонть анок.
v Запчастнень, v корты главной инженерэсь В.Н.Есин, v минь вешнинек эрьва косто: и ярмак лангс, и максозь услугатнень кис, и бартер лангс. А мезть кортамс, тень коряс ней миненек стакадояк стака.
Кортамонок поладсынек сеньсэ, што весемезэ ?Спецавтохозяйство¦ муниципальной предприятиясонть важодить 330 ломанть, эйстэст 30 инженерно-технической роботникть. Тешкстасынек, эрьва иестэ весе важодицятне ютыть аттестация. Тень туртов Наукань ды техникань кудостонть сакшныть тонавтыцят. Сынст марто вейсэ водительтне эште весть лецтнить ды тонавтнить ки ланга ардомань правилатнень, ильведькстэме ардомань лувонть ды седе тов. ИТР-нь важодицятне ютнить УКК-нь (учебно-курсовой комбинат) курсатнень, косо тонавтнить важодемань ванстомань правилатнень.
Икелепелев ?Спецавтохозяйствань¦ администрациясь бажи кемекстамс ды келейгавтомс эсь материально-технической базанзо. Тень туртов тесэнь специалистнэ анокстасть од проект, конань вельде арсеви теемс машинань шлямо таркат, стявтомс заправка, песоконь ды салонь кирдемань складт. Весе неть вадря тевтне, лездыть стямс предприятиянтень пильге лангс ды сыргамс икелев. Покштояк покш задачакс ашти сеяк, кода бу лоткавтомс кадратнень туемаст, уставамс шкастонзо зарплатань максомо, линия лангс нолдтнемс витнезь-петнезь, апак тапа техника. Весе неть вадря енкстнэнь теемстэ эряви ютавтомс покштояк покш робота. Ды те роботанть, койсэнек, покш мельспаросо, лезэвстэ ды эрявикстэ топавтыть меельце шкастонть ?Спецавтохозяйство¦ муниципальной предприятиянь прявтнэ. Секскак текень кувалма меревлинек бу, што те предприятиянть карми улеме вандынь чизэ.
А.ПОЛЯКОВ.
