Врачонь мель
Врачонь мельМЕЗЕС ВЕТИ СМУСТЕМЕ ЭРЯМОСЬ
Масторозонок демократиянть марто сась ламо истямось, мезесь чаракавты ломантнень превест, велявты эйсэст эрямонь виде кистэ. Кода цидярдомс, зярдо телевизоронь пачк чинь-чоп невтить ломанень маштомат, сынст лангсо нарьгамот. Мезе ансяк ашти минень-сюнонь рекламась? Састь истят ормат, конатнеде икелень шкатнестэ марсилинек ансяк кодамояк омбо масторонь кинофильмасто. СПИД-сь ды наркоманиясь ней пачкодсть миненекак ды аламо меремс пачкодсть, сынь минек обществанть туртовгак теевсть покш кажокс, эдь ормалгадыть сехте ламо од ломантнестэ.
Марина Анатольевна Макарова прядсь Мордовской госуниверситетэнь медицинской факультет. Сон врач-нарколог. Мертяно седе ламо, Марина Анатольевна больницясо наркологической отделениянь прявт. Наркоманиянть авась содасы аволь евтнемань ды омбо масторонь кинофильмань коряс. Кевейкее иень перть врачось леци наркомант ды ?пиже гуень¦ вечкицят. Вана мезе сон тенек евтнесь:
v Минек отделениясо лецятано сетнень, кить тонадсть наркотиктненень, винадо симнеме. Кода врач, мерян, неть пек стака ормат. Седеяк седеесь ризны, зярдо неть орматнесэ сэредить од ломантне. Сыненст бу роботамс, трямс-кастомс эйкакшт, сынь жо вана мезес пачкодсть. Миненек тей эрьвась понги эсь ладсо: веенстнэнь усксызь ?Скорой помощьсэ¦, омбонстнэ сыть сынсь. Наркотикень примамодо лоткамодо мейле ломаненть кармить чулксетеме-таргатомо ловажанзо ды организмась веши лия доза. Те шкастонть истямось ломань еновгак а моли ды анок теемс эрьва мезе.
Монь ульнесь покш мелем кевкстемс, бути наркоманиясь орма, лецяви- арась сон? Вана мезе мерсь тень лангс врачось.
v Мон, кода врач, мерян, ламось ашти эсензэ сэредицянть эйстэ. Чарькодеви, эряви ламо потмо вий. Бути истямось ули, ормась изняви. Эрьва сэредицянть лецямодо мейле минь кирдтяно учетсо. 5 иень перть минь мельганзо вантано, лиякс меремс, сон минек сельме икеле. Бути те шкань перть весе вешематне топавтовить, учетсто минь сонзэ сайсынек.
v Наркоманиясо сэредицятнень, v полады евтнеманзо Марина Анатольевна, v мон яван колмо группас. Васенцетне, неть школасо тонавтницятне. Сынст иест 14-15. Илядо дивсе, наркоманиясь пачкодсь минек школатнескак. Максыть весть-кавксть стякодо варчамс. Колмо дозадо мейле ломанесь истя тонады, мик а жали кодаткак ярмакт, ансяк бу улевель наркотикесь. Омбоцетнень иест 20-23. Сынст ютксо ламо истят, конатне эрямосонть а неить кодамояк смусть. Омбонстнэ кадовсть роботавтомо ды эрямонь стакачитнень снартнить стувтнемс наркотиктнень вельде. Колмоцетнень иест седе ламо. Сындест а мерят, што сынь эрямосонть обидязь. Ламотне эсь пряст ловить од рузокс. Сынь чинь-чоп роботыть, ламолгавтыть эсь сюпавчинть. Роботась саи пельдест ламо вийть. Винадо те шкастонть сыненст симемс а кода, секскак стресстнэнь сынь панить истя жо наркотиктнень вельде. Кода илязо уле, финишесь весемень туртов вейке v минек отделениясь. Бути эште кавтошка, колмошка иеде икеле тенек ковозонзо понгильть вейке эли кавто наркомант, ней картинась овсе полавтовсь берянь енов. Течи явозь 10 таркатне чаво зярдояк а эрсить. Те корты ансяк вейкеде, наркоманиясь минек ошсояк ламолгады. Те, нама, покш кажо, эдь наркоманонть пингезэ пек нурькине. Од ломанесь, кона каясы прянзо наркотиктнес ветешка иень ютазь киненьгак а содави. Ды, бути сон эште аволь калмолангсо, тееви лангс ваномс пек сырекс. Сонзэ шумбрачись ковгак уш а маштови. Евтадо: кинень эряви истямо ломанесь? Кодамо сондензэ лезэ? Секскак, кода врач, мерян, ванстынк эйкакшонк ды малавиксэнк наркотиктнеде.
Алкукскак, истямо евтнемадо мейле арсезеват, зяро од ломанень уцяскат ваясть наркотиктненень. А стяко кортыть, виде ки лангсто велявтомс ансяк шожда, мекев стямс жо пек седе стака ды удалы а весеменень. Меельцекс врачось-наркологось Марина Анатольевна Макарова мерсь: минь, врачтне, кода илязо уле, карматано бороцямо эрьва ломаненть кисэ, кодамо сон илязо уле ды тейсынек весементь, мезесь ашти эйстэнек. Кадовиксэсь ашти эсензэ сэредицянть эйстэ. Лезэсь а ули, бути лецицясь кудов самодо мейле одс кунды салмуксонтень.
Н.ЕВДОКИМОВ.
