Кие идесы минек культуранть?
ОД ПИНГЕВ МОЛЕЗЬСЕЗЕЗЬ МОРО ЭЛИ КИЕ ИДЕСЫ МИНЕК КУЛЬТУРАНТЬ
Весе, мезе теи ломанесь, келя, теи пекензэ пештямонть кисэ. Мезе мерят тень каршо? Истямокс, нать, сонзэ теизе сонсь Пазось ды тень кияк а полавтсы. Апак ярса, пекень апак пештя ломанесь алкукскак кувать а цидярды.
Ярсамс веши оймеськак. Апак андо сон истя жо карми коськеме, куштамо ды кевензамо. Ансяк аламо андомс, эряви содамс v мезде. Кода пекесь карми сэредеме, зярдо эйсэнзэ пештят мейсэ понгсь, истя ойментькак стардсы орма, карминдерят эйсэнзэ каванямо, кие соды мезде. А стяко мереви: ?Мезе каят, секень саят¦. Сювасто паро лисевкст а касыть ды паро превтькак а чачить.
Сень, мезе каи оймезэнек неень культурась, сювакскак лемдямс, маряви, а маштови. А истя? Сестэ совак книгань лавкас. Варштак, мезть тосо микшнить. Косот сеть книгатне, конатнень ловномсто седеесь менелев аноколь кепетемс? Ловнылить, теке ванькс лисьмапрясто симемат явавтылик. Ней мезе? Саят книга, тонгсыть эйзэнзэ сельметь ды теке чинев эрькес прят навасак. Тосто а мусак се ежомарямонть, конань лемезэ вечкема. Сонзэ таркас се самай порнухась ды ?сэксэсь¦, кона педиця орма ладсо яки ланганок ды, теке чемень, сэвезь-сэви весе мазыенть, валдонть ды ваньксэнть, мейсэ сюпав ломанесь, сонзэ оймезэ.
Панжсыть ?ожо¦ газетатнень, тосо текесь жо: штапо тейтерть ды ?убийстват¦, ?изнасилованият¦, ?гибельть¦.
Телевизоронть лангс варштамскак пелят. Фильматнесэ ансяк содыть леднить, прят керсить, сельмть таргсить, сюлот лазныть ды- таго ава-цёра марто удомо тонавтыть. Визькс.
Кинотеатрань афишатнень эйстэ васолдо уш тандадат v ванькс ?монстрат¦, ?вампирт¦, ?оборотенть¦. Нолдасак радионть, тосояк v дирь-бирь трю-ля-ля. Моротне v а валт а чарькодят, а музыка а марят. Пилесэнть v барабанонь зэрть ды цяв-цяв вайгельть (киска левксэськак седе мазыйстэ цийни). Те истя, келя, од ломантнень мелест ваныть. Сынст ней вийсэ а кармавтсыть кунсоломо паро морот. Макст тенст минень-сюнонь попсат, рокт, джазт, рэпт ды лия бугить-вугить. Те, паряк, а берянь. Ансяк сень, мезе озы оймезэст истямо музыкань кунсолозь, а стака чарькодемс. Мейле кевкстнетяно, мекс од ломантне истят кежейть ды аксунт. Кодамокс эно тенст улемс, зярдо чинь чоп сельмест икеле тюремат ды кежень пандомат? Косо шукшпрят, тосо карвот ливтнить. Западсо, косто сы весе те продукциясь, умок уш чарькодизь истямо ?искусстванть¦ зыянонзо ды эрьва кода бажить кардамс сонзэ. Минь те шкас яла эзинек пешкеде. Аволь лоткавтомс, кедень келемтезь вастатано ды весемеде икелев нолдатано. Эсенекенть кенкш удало ды панжома экшсэ кирдтяно.
?Эсенекесь¦ тесэ аволь эрзянсесь. Сень минь умок уш варма мельга нолдынек. Эсенекесь тесэ v се, мезе ульнесь ды ули парось минек масторонь (Россиянь) культурасонть. Россиясь v те аволь ансяк рузт. Малав кавтосядт раськеть эрить тесэ. Эрьванть эсензэ культуразо. Ансяк рузонсесь, чарькодеви, свал мольсь весемеде икеле. Морот кунсолынек рузонь, книгат ловнынек рузонь кельсэ, фильмат ванынек малав весе рузонь.
Истя уш лиссь Россиясо: вишка раськетне свал ульнесть та-кода ве ено v стувтозь ды кадозь. Леместкак эсест арасель. Кода ансяк эзть мерне тенст ?иноверцы¦, ?инородцы¦, ?туземцы¦, ?аборигены¦, ?автохтонные народы¦.
Теке шкасто самай неть ?инородецтнэнь¦ превтнесэ-кедтнесэ кассь-кепететсь Россиянь культурась.
Арсемс, буто покш раськенть покш культуразо, вишка раськенть v вишкине, улемс чопода ломанекс. Самай теньсэ минекак секе тев нерькстнить-пельнить кой-кить: арась, келя, тынк мезенкак. А стувтса, кода вейке статьясонть (лемезэ v ?Кто спасет мордовскую культуру?¦), кона лиснесь ?Вечерний Саранск¦ газетасо (1995 иень августонь 17 чинь номерсэнть) снартнесть эрзятнень ды мокшотнень тулкадемс сехте удалов. Илямизь лово кенгелицякс, лецтян зярыя валт те статьястонть: ?А ведь может быть у маленького народа большая культура! Киргизов всего три миллиона, но у них есть писатель с мировым именем v Чингиз Айтматов. Чукчей от силы 20 тысяч, но у них есть Юрий Рытхэу, которого знает вся Россия, фильмы по романах которого смотрели миллионы-¦ Минек культурастонть те статьянь авторось эзь муе мезеяк. Виде, эзизе стувто лецтямс Степан Эрьзянь. Ды v на теть v ловизе ?эсест¦ ломанекс.
Степан Эрьзя, конань лемензэ ней содасызь весе модамасторонть келес, кадык лемдитькак эйсэнзэ ?рузонь Роденэкс¦, эрзяль. Ды сон содавикс ды ине ломантнестэ, паряк, ськамонзоль, кие эзь сепо тень ды натой омбоце лемекскак саизе эсензэ раськенсенть. Аволь ?мордвин¦, аволь ?мордовец¦ v Эрьзя! Те валось а кулы, а еми зярдояк. Сынсь эрзятне а ванстасызь (тенень сон моли), ванстови ды карми эрямо ине скульпторонть произведениятнесэ, конат муизь эсь таркаст весе раськетнень вейсэнь культурасонть.
Лия ине ломантнень, конат лиссть эрзянь раськестэ, эзь сато, нать, корост евтамс: ?Мон v эрзян!¦ Лидия Русланова весень туртов ульнесь ?рузонь примадоннакс¦, куш тетянзо-аванзо эрзятольть. Сестэ, келя, эрявкшнось истя теемс v сепомс эсеть национальностенть. Истя эрзянь раськестэ лисезь содавикс артистнэ, ученойтне, ушмодейтне (военнослужащейтне) ды лия профессиянь ломантне теевсть рузокс. Меремс, кие содась: артистэнть Олег Табаковонь сантнэва чуди эрзянь верь? Космонавтонть В.Севастьяновонь покштянзо-бабанзо, кортыть, истя жо эрзятольть. Надежда Кадышевадо, кона морси ?Золотое кольцо¦ ансамблясо, кавтолдомскак а мезть. Аванзо-тетянзо чачома велест ульнесь Самарской областень Клявлинской райононь Маклауш эрзянь велесь. Сонсь морыцясь чачсь Татариясо, Альметьевской райононь Горкина велесэ.
Чачомс эно куш козонь чачт. А вана марямс прянть эсь раськень ломанекс v те аволь весенень максозь. Икеле пельсть, ней v виздить. Виздить кортамс тиринь кельсэ, виздить эрзянь морот морсемс. Ули-арась Кадышевань репертуарсо вейкешка эрзянь моро ды мезень кис тензэ максозь Мордовия Республикань народной артисткань лемесь v те шкас кадови содамоёвксокс. Минек свал истя: касыть-кепетить вере текшос раськенть лемсэ, сынсь сур а токавтыть сонзэ лезэс. Сеть жо, кить алкукс теить эсь путовксост культуранть туртов, сеедьстэ кадовить орта удало. Саемс Вера Прохоровань. Те истямо морыця, конатнень икеле аштить пульзядо кумажа лангсо. Моры v оймезэть тештень рисьметь викшни. Сон, келя, тонавтнесь Л.Зыкинань кедьсэ. Эри Московсо. Ве ено эрязьгак, эзинзе стувто эрзянь моротнень. Ансяк сынь таго-мекс а пачколить минек туртов. Паро, радиосо журналистэсь М.Моторкин (сюконятано тензэ) вастневсь те морыцянть марто ды сермадынзе пленка лангс зярыя моронзо, конатнень кунсолозь, кевень седееськак чевтеми ды солы. Истят ломантнень кедь лангсо кантнемальть, минь леместкак а содасынек.
?Арась тынк мезенкак¦. Яушев, мезе, аволь минек? ?Эрзянь Шаляпинэкс¦ сонзэ лемдясть аволь ансяк мазый сельмензэ ды покш сэрензэ кисэ. Сон морыцяль, кодат чачить сядо иес весть. Моро серьгелиль v вайгелезэ менель лазыль.
Паро тев тейсть сеть, кить сонзэ лементь максовтызь музыкальной театрантень, кона ашти Саранск ошонь куншка куросо. Вейкенть стувтызь: Яушев эрзяль ды пек вечксь эрзянь морот. Ламо-аволь эйстэст гайгсть те театрасонть, корты истямо цифрась: 1935 иестэ саезь, зярдо панжозель сон, тосо путозельть сядонь сядо оперань спектаклят. Эйстэст мокшонь ды эрзянь кельсэ v мельгам ловодо зяро: Л.П.Кирюковонь ?Литова¦ (1943) v вейке, ?Несмеян и Ламзурь¦ (1947) v кавто, ?Нормальня¦ (1962) v колмо ды окойники нилецесь v ?Сияжар¦ оперась, конань сермадызе ды путызе композиторось, сонсь жо режиссерось М.Н.Фомин. Мезесь седе стакаль тензэ: сермадомс музыканть эли путомс спектаклянть, v а эряви кевкстемскак. Путомсто, нама, седе стакаль. Ды аволь истя ярмаконь аразьчиденть (кадык сыньгак эзть сатно), кода сень кувалма: а кинень ульнесь налксемс. Театратнесэ 16 артистнэнь ютксто муевить сехте ламо нилешка ломанть, кить содасызь эрзянь ды мокшонь келенть.
Рузонь драмань театрадонть кортамояк а карматано. Рузонсесь рузонсекс кадовияк.
Покш кемемат путнинек национальной театранть лангс. Окойники, кенярдозь кортынек, сась се шкась, зярдо карматано ваномо спектаклят тиринь кельсэ. Васня истя ульнеськак: таго-зяро спектаклят путозельть ды а берянть. А.Пудинэнь, К.Абрамовонь, Г.Меркушкинэнь, К.Петровань, В.Мишанинань пьесаст коряс спектаклятнень ванызь ламот ды, эряви меремс, вейкеяк ломань эзь кадово мелень апак вите. Арсинек, седе товгак сон карми кенярдовтомо эйсэнек од ды седеяк паро спектаклясо. Манявинек. Национальной театрась пурдынзе ажиянзо секе кинтень, кува молить лият: кармась путнеме спектаклят рузонь кельсэ. Мейсэ тевесь? Васняяк, келя, ломантнень арась мелест ваномс спектаклят тиринь кельсэ. Велев-ков сыргамсто вешить, марят, ускомс рузонь спектаклят. Омбоцекс, арасть пьесат эрзянь ды мокшонь кельсэ, а мезе лангс путомс спектаклят.
Сынь а манчить. Пьесат алкукс арасть. Сермадомскак а кинень. Ведьгемень вейке ломантнестэ, зяро совить Писателень союзс, 16 v рузт, 17 v эрзят, 18 v мокшот. Юткстост покш произведениянь сермадыцятнеде v вейке-кавто. Драматургт, ловт, овсе арасть. Ды косто тенст саевемс, зярдо тиринь кельсэ сермадыцятнень перька стявтсть кевень пирявкст? Сермадт-иля сермадо v произведеният ялатеке кадовить апак печата. Издательстванть тень туртов, марят, арасть ярмаконзо. Муят спонсор v печатасызь, арась v иля пеняця. Гонораргак тень кис иля учне. Кие теде мейле карми стякодо костямо-тапамо пря удемензэ?
А седе парсте тевесь ашти музыкальной искусствасонть. Минек композитортнэде ламо-аламо v 13. Те v зняро, зяро совить Композиторонь союзов. Кевкстемс сынст, мезень кис ярсыть эсест кшист, ламотне, маряви, а евтасызь. Композиторось v истямо ломань, кона сермады морот. Мезе теить минектне, содыть ансяк сынсь. Морост, кода иля чара, а марсевить ды а неявить. Паряк сермадытькак морот сынь v таго рузонь кельсэ. Ськамост Н.Кошелева ды Н.Митин косто-косто казить вейке-кавто морот v ды весе. Мейле кевкстнетяно, мекс ?Келу¦, ?Умарина¦ ансамблятне, конат лововить национальной коллективекс, морыть некеть моротнень. Репертуарост а полавтневи иестэ иес, кода, меремс, оршамосткак. Комсь иетнень перть, зярс эри ?Келу¦ ансамблясь, оршамот тенст стакшность сехте ламо колмоксть. Те кода эряви ванстомс оршамопелесь ды а калавтомс комсь иень перть?
Сестэ, зярдо ?Келу¦ ансамблянь аватне концертэнь перть лиснить секеть оршамотнесэ, ?Росичинь¦ морыцятне цють а эрьва моронть мельга полавтнить панарост-руцяст. Ды сынст весе ставтызь нилешка иес, зярс морси те ансамблясь. Теке мазысь гастрольтнень коряскак. ?Келунть¦ туртов ярмакт, кода свал, арасть, лия ансамблятненень, несак, муевить.
Мезде те корты v а стака чарькодемс. Минь, кода ульнинек а вечкевикс эйдекс эсенек республикасо, истямокс кадовинекак.
Мезе учи эйсэнек сы шкасто, пря яжамскак а эряви. Сы шканок v те эйкакштнэ. Кодамокс касыть сынь, зярдо оймезэст а путови вечкемань ежо а тиринь келентень, а эсь раськентень? Те тевесь, кортыть, образованиянть ды культуранть кедьсэ. Образованиясь v те школатне. Тиринь келень тонавтомась тосо парсте ветяви ансяк образованиянь министерствасо важодицятнень валсо-кемевтемасо. Терявтодо ютамс тынсь школатнева ды несынк, ламотнесэ тиринь келенть аволь тонавтыть, нарьгить лангсонзо.
Культурась? Сень, маряви, тевезэяк арась минек эйкакштнэнень. Ды те весемеде парсте неяви сеть передачатнень эйстэ, кодат нолдтнить минек телевидениясь ды радиось. Тосто мариде куш вейкешка од моро, кона улевель сермадозь эйкакштнэнь туртов тиринь кельсэ? Неиде куш вейкешка спектакля, евкс, мультфильма, кона улевель путозь эрзянь эли мокшонь кельсэ? Ансяк весть ?Сияжар¦ редакциясь невтсь мультфильма, конань А.Чакин ютавтызе рузонь кельстэ эрзякс. Ды v весе. Мекс бу тень а поладомс седе товгак, кода теить Чувашиясо? Тосо, маринек, чинь-чоп телевидениясь корты чуважонь кельсэ. Рузонь фильматнеяк, весе передачатне ютавтовить чуважонь кельс. Мерть теемс истя минекак v сельметь карасызь. Ули, келя, тынк ?Сияжаронк¦ ды саты тенк. Ёвтамс ве ено эриця ломантненень, зяро минутат моли ?Сияжарось¦ v пейтьсамизь. Россиясояк, арсян, а муят истямо республика, косо тиринь кельсэ передечатне молевельть колоньгемень-ниленьгемень минутат (аволь чизэнзэ, недлязонзо). Сетненьгак сеедьстэ ?салыть¦, тарказост нолдтнить рузонь кельсэ передачат. Тень лемезэ v ?андомскак а андыть, калмамскак а калмить¦.
Кодамо текшос пачкодсь минек культурась, весемеде парсте невтизе концертэсь, кона алтазель Мордовиянь автономиянть теема шкасто саезь 70 иетнень топодемантень. Мезесь ульнесь эйсэнзэ аволь рузонь v те (вейке-кавто эрзянь-мокшонь моротнеде башка) вейке ансамблясь, кона сакшнось Кабардино-Балкариясто ды кона невтизе, кода эряви вечкемс эсь раськенть, эсь культуранть ды эсь прянть. Паряк, зярдояк карми истя улеме. Зярс жо минек ойметне чавот (истямо оймесэнть, кортыть, арась тарка вечкемань ёжонтень). Ды а мейсэ пештямскак. Морось, конань ушодокшнызе ?Масторавась¦ сезевсь ды сонзэ а кинень поладомс. Ансяк те кортамось уш лия .
Раиса ЩАНКИНА.
