Эйкакшонь трицятненень-кастыцятненень
ТАЛАКАЛИЦЯ ТОНАВТНИЦЯНачальной классонь тонавтыцякс кувать роботазь, сеедьстэ савкшнось ды савкшны тень марсемс тетятнень-аватнень эсь эйкакшост лангс пеняцямост. Келя, уроконь теемстэ арси мезде-бути лиядо, ушоли тевень топавтомо, мукшны сядо тувталт ды, нама, тень коряс сермадомсто нолдтни ильведевкст. Тесэ, алкукс ули мезде талномс. Эдь истямо ?вармань кундсицясь¦ малав свал тонавтни лавшосто. Кинень те вечкеви? Секскак, бути ули меленк неемс тейтеренк эли церанк вадря тонавтницякс, шкань апак таргсе кундадо тензэ лездамо. Бути васенце классонь тонавтницясь ловны ды сермады ильведькс марто, топавтодо зярыя упражненият. Истя, книгасто саеде аволь покш сермадовкс ды кармавтынк эйкакшонть башка букватнень вешнеме-черькстнеме. Мейле вейсэ мукшнынк ды витинк нолдазь ильведькстнэнь.
13-14 предложениясто арседе текст ды сермадомсто ?нолдадо¦ 2-3 ильведькст (некеть валтнэнь, букватнень кавксть сермадомась, валонь, буквань нолдамось, валтнэнь вейке-вейкест марто аладямось). Эйкакшонть кармавтынк ильведькстнэнь муеме-витеме. Те тевесь топавтовкшны зярыя койсэ: эсь пачка ловнозь, марямга ловнозь, слогтнень стядо кикссэ явнозь эли ильведькстэме текстэнть коряс. Ялатеке, тень пингстэ кармавтынк эйкакшонть ильведевксэнь вешнеме эрьва валстонть, кевкстинк седе, сатыть-арась эйсэнзэ букватне, истя-арась гайги, лади-арась шабра валтнэнь марто ды мезде кортави предложениясонть. Лездадо эйкакшонтень, бути те тевесь маряви тензэ стакакс. Тонавтынк сонзэ аволь пачка невтиця линейкань марто роботамояк. Валось кекшеви ды линейканть вельде панжови слогонь слог. Эдь ильведькстнэяк нолдтневить секс, мекс тонавтницясь, валонть целанек содазь, ?чии¦ икелев ды ?а пупорькшни¦ ильведевкстнэнь теезь.
Эйкакшонть мелензэ ?пштилгавтсызь¦ ламо налксематнеяк. Сайсынек вейкенть: кевкстематнень каршо ?да¦ ды ?арась¦ валтнэнь а евтнеманть. Кевкстематне саевить эрьва кодат. Примеркс, вечксак-арась теленть, вечкат-арась сокссо ардтнеме, вечкат-арась якшамо чить ды седе тов.
Лия налксемась кемексты аволь ансяк эйкакшонь обуцянть, сон ?пштилгавты¦ сельмтненьгак. Те налксеманть смустезэ истямо: конев лангс тешкстамат эрьва кодат фигурат. Эйкакшось колмошка секундань перть вансынзе ды мейле мельсэнзэ аштеманть коряс рисовасынзе.
Лия налксеманть лемезэ ?Повт¦. Конев лангс рисовадо пецек аштиця вейксэ квадратт. Кавтотнес эли колмотнес (козонь меленк) путодо повт. Эйкакшось аламос вансынзе ды шкань ютазь тейсы текень. Квадратнэнь ды повтнень ламочист полавтневи.
Мель яводо ?Муик ды черькстык¦ налксемантеньгак. Смустезэ истямо: ламо букватнень ды цифратнень ютксто эряви муемс башканть, примеркс, Н букванть ды 5 цифранть. Эрьва кодат букватнеде ды цифратнеде сермадома зярыя строчкат. Юткстост муемат эрявикстнэнь.
Пек пштилгавтыть вишкинькатнень удемест эрьва кодат пря яжамкатне, содамоевкстнэ ды кроссвордтнэ. Нама, сынь улест шождат, эйкакшонтень чарькодевиксэкс.
Вишкинькатненень пек вечкеви ?Лецтик таркаст¦ налксемаськак. Саевить эрьва кодамо тюсонь 6-7 карандашт эли коневонь панкскеть, ладсевить эрьвейке ваксс. Эйкакшось аламос вансынзе. Мейле карандаштнэнь (коневтнень) таркаст полавтовить. Вишкинькантень эряви лецтямс таркаст.
Неть налксематне ансяк зярыя, конатне тонавтыть эйкакшонть арсеме, тонавтнемантень мелень явомо. Лия налксемат мутадо башка книгатнестэ, конатнеде ней ламодояк ламо микшневить книгань лавкатнесэ. Ансяк рамамстост мель яводо сермадовксонть лангс. Кочкамс эряви смустевенть, седе лезэвенть. Тень коряс пек парт ?Академия развития¦ лем ало книгатне, конатне нолдазь Ярославль ошонь издательствасо. Сынст эйстэ мутадо ответт талновтыця ламо кевкстематнень лангс.
Меельцекс лецтявлия: тонавтнемантень мелень а явомась ормань кондямо, конась карми виевгадомо эйкакшонть касоманзо марто ды сонзэ теевемасонть чумот покштне, конат нузялгалить отвечамс вишкинькинетнень певтеме кевкстемаст лангс. Эдь зярдо эйкакшось максы кевкстема, сон бажи содамс. Бути мелензэ а топавтомс, сон лотки кевкстнемеде. Зярдо жо те ильведьксэсь теезь, ялатеке ацирьгалемс а эряви v тевесь витевикс. Ансяк ней эрьва кодат кевкстематнень сеедьстэ макснемат эйкакшонтень. Истя, кевкстнезь-толковазь шкань ютазь вельмевтеви тонавтнемантень мелесь. Эряви цидярдомс, аламошкас учомс ды, нама, апак лотксе ютавтнемс вере лецтязь уроктнень-налксематнень. Пек паро, бути сеедьстэ карматадо шнамо эйкакшонть изнявксонзо кисэ.
С.ТЮМЕНЦЕВА,
Саранск ошонь 1 ¦ школань
начальной классонь тонавтыця.
