Тантей морковось
КОДА ИЛЯК АНОКСТА, СВАЛ ТАНТЕЙ МОРКОВОСЬ
ПИДЕЗЬ. Ванськавтозь морковонть керсемс кубикекс эли палкинекс, путомс кастрюляс, пелевидьс каямс ведь, пенч ой ды пидемс 30 минутат, почодомс аламошка сал, каямс кадовикс оенть, лимононь кислота эли уксус ды пидемс эште 5 минутат. Пси морковонть вачкамс калязь банкас. Литрань банкатнень ведьсэ лакавтомс 10 минутат, пекстамс.
Вейке килограмма морковонтень саемс 3 покш пенчть скалой, 1 пенч уксус эли 2 граммат лимононь кислота, салось танстень коряс.
ПРЯКА МОРКОВ МАРТО. Оргатнень лопавтемс пель стопка лембе ведьс, каямс вишка теркасо човазь морков, алт, стопка почт, човорямс, путомс лембе таркас. Зярдо чапаксось кепети, каинк кадовикс почтонть, салонть, сахаронть, оенть, ванилинэнть, парсте човоринк, ды кадынк чапаксонть чапаськадомо. Форманть ваднемс ойсэ, почодомс кошксесэ ды каямс сонзэ лангс чапаксонть, кирдемс 3-5 минутат.
Пидемс духовкасо (малав часонь перть).
300 граммат човазь морков, 500 граммат почт, 100 граммат ой, 1 стопка сахар, 2 алт, 15 граммат оргат, аламошка сал ды ванилин.
ЧОВАЗЬ МОРКОВТ ЭЙКАКШТНЭНЕНЬ. Вишка эйкакштнэнень икелепелев анокстадо човазь морковт (пюре) умарь марто. Тень туртов ванськавтозь ды шлязь морковонть пидинк аволь ламо ведьсэ, целанек пиемадо 5 минутадо икеле каядо умарть, мейле весементь нолдынк сувтемень эли дуршлагонь пачк, човоринк, каядо сахар, сурпринесэ сал, пачтинк лаказевемазонзо, кайсинк ванькс ды костязь банкава ды литрань банкатнень ведьсэ лакавтынк 20 минутат, пель литрань v 15 минутат.
Вейке килограмма морковс саемс 500 граммат чапамо эли ризаня умарть, 150 граммат сахар, 5 граммат сал.
ВАРЕНИЯ. Целасто пидинк вишкине морковтнень, эли жо керсинк кубиксэ, олгинекс, палкинекс. Лангозост каядо кельме ведь, пидеде 7-10 минутат, веденть валынк ды эйстэнзэ анокстадо сироп, сонзэ каинк морковонть лангс ды одс путынк тол лангс, штобу морковось пачк неезэ. Меельцекс каямс лимононь кислота.
Саемс: 1 килограмма морков, 1 килограмма сахар, 3 граммат лимононь кислота.
Варениянть седе паро пидемс зярыяксть тол лангс путозь, сестэ морковось ванстсы тюсонзо ды сонзэ эйстэ мереви анокстамс цукатт, морковось таргави сиропстонть ды костяви.
Те варениянтень каяви клюква. Сон пидеви ды нолдави дуршлагонь пачк. Варениянтень каяви пидеманть прядомадо пель часто икеле.
Вейке килограмма морковс саевить: 300 граммат клюква, 1-1,1 килограмма сахар, 0,6 литра ведь.
Варениянть пидеме путомс колмоксть.
КОТЛЕТАТ (эште мик сывель марто). Тувонь ды скалонь сывеленть нолдамс мясорубкань пачк, каямс човине теркань пачк нолдазь морков, ловцо, ал, рестазь чурька, сал, перець, човорямс, теемс котлетат, теде икеле кедтнень начтомат ведьсэ. Котлетатнень рестамс эждязь пачалгсо.
Морковось саеви 25% сывелень сталмостонть.
САЛАТ ?ПИКАНТНОЙ¦. Морковонть ванськавтомс ды нолдамс човине теркань пачк, истя жо теркань пачк нолдамс сыр, каямс керсезь пейне чурька, весе тень човорямс майонез марто. Столь лангс путомс сывельстэ анокстазь ярсамопель марто.
Бути тыненк сыть инжеть,анокстадо истямо ярсамопель: керседе човине палнэсэ пидезь колбаса, кольцинетнень керсинк кавтов, тапардынк ?баягинекс¦. Сонзэ эйс вишка пенчкесэ путодо истямо салат. ?Баягинетнень¦ вачкинк ваканс ды мазылгавтынк майонезсэ.
Саемс: кавто морковт, 70-80 граммат сыр, пейне чурькадонть v 4 пейнеть, 2-3 пенчть майонез.
ЗАПЕКАНКА. Ванськавтозь морковонть пидемс ды човамс, каямс алтюжат, сахар, корица эли ванилин, пенч манка, човорямс, каямс човорязь алашот. Весе тень састыне човоринк. Форманть ваднинк ойсэ, почодынк кошксесэ, каямс весе анокстазенть ды пидемс духовкасо.
Ярсамс ловцо, кисель, ламбамо велькс марто.
Саемс: морков v 400 граммат, сахар v 20 граммат, кавто алт, кошксеть v 10, ой v 5 граммат.
Истямо запеканкас мереви каямс изюмгак v 50 граммат, варениясто ягудат v 3 пенчть.
ЯМ. Ванськавтозь морковонть керсемс олгинекс, рисэнть шлямс. Лакиця ведьс каямс морковонть, рисэнть ды пидемс зярс а чевтемить, каямс ловцо. Зярдо ямось лаказеви, толонть вишкалгавтомс ды пидемс анокставомазонзо. Ямонть мереви анокстамс ристэмеяк.
Морковонть саемс v 250 граммат, рис v 80-100 граммат, ловцо v 250 граммат, ведь v 0,5 литра, ой v 20 граммат, салонть v танстень коряс.
КАША МОРКОВ МАРТО. Кашанть туртов морковонть човасынек теркань пачк, суронь ямкстнэнь шлясынек, палнэсэ керсетяно умарть. Кедьгес каясынек ямкстнэнь, човорясынек умартнень марто, каясынек морковонть, почодтано сал, пенч сахар. Истя жо каяви аламошка ловцо, весементь човорясынек ды путсынек духовкас. Ловцось човоряви ведь марто.
150 граммат суронь ямкст, 200 граммат морков, 100 граммат умарть, 50 граммат ой, 400 граммат ловцо. Анок кашанть столь лангс путсынек кельме ловцо марто.
